Bókmenntahátíð í Reykjavík

Þökk

bokmenntahatid — Wed, 14 Sep 2011 22:37:54 +0000

Þá er tíundu Alþjóðlegu Bókmenntahátíð í Reykjavík lokið. Bekkurinn var þéttsetinn í Iðnó á sunnudagskvöldið þegar síðasta upplestrarkvöldið fór fram. Sex höfundar stigu á stokk og síðastur kom Eiríkur Örn Norðdahl sem flutti kröftug hljóðljóð. Hér er eldri upptaka þar sem má sjá og heyra síðasta ljóðið sem hann flutti ,,Úr órum Tobba“:

http://www.youtube.com/watch?v=9kNyd2um4UE&feature=related

Við þökkum öllum erlendu höfundunum sem lásu upp í Iðnó og jusu úr viskubrunni sínum í Norræna húsinu. Þökkum íslensku höfundunum sem lásu upp og þýðendunum sem brúuðu bilið milli menningarheima. Síðast en ekki síst þökkum við öllum sem tóku þátt með því að leggja leið sína á upplestrana í Iðnó, á bókaballið og höfundaviðtölin í Norræna húsinu.

Sjáumst aftur að hausti 2013!

bokmenntahatid — Thu, 08 Sep 2011 16:33:51 +0000

Því miður mun Steve Sem-Sandberg ekki heimsækja Bókmenntahátíð í Reykjavík vegna veikinda.

Opnir fyrirlestrar í dag

bokmenntahatid — Thu, 08 Sep 2011 11:51:28 +0000

Í dag verða tveir opnir fyrirlestrar hjá höfundum Bókmenntahátíðar.

Sá fyrsti verður kl. 14:30 í Norræna húsinu. Nawal El Saadawi mun flytja erindi á vegum Rannsóknarstofu í kynja- og kvennafræðum við Háskóla Íslands. Erindið fer fram á ensku og ber heitið ,,Creativity, Dissidence and Women”. Aðgangur er ókeypis og öllum heimill.

Alberto Blanco mun flytja fyrirlestur kl. 16:00 í Lögbergi 101 (athugið breytta staðsetningu) um mexíkóska listasögu. Fyrirlesturinn nefnist ,,Twenty Chapters of Mexican Art in the 20th Century” og fer fram á ensku. Fyrirlesturinn er á vegum Stofnunar Vigdísar Finnbogadóttur í erlendum tungumálum við Háskóla Íslands. Allir velkomnir.

Söguleg örlög

bokmenntahatid — Mon, 05 Sep 2011 07:44:24 +0000

Bókin Frönsk svíta eftir Irène Némirovsky kemur út um þessar mundir hjá Forlaginu í þýðingu Friðriks Rafnssonar. Fyrir seinni heimsstyrjöldina var Némirovsky vinsæll höfundur í Frakklandi. Dóttir Némirovsky, Denise Epstein, er gestur Bókmenntahátíðar í ár en hún kynnir verk móður sinnar. Epstein var ung að árum þegar móðir hennar lést í útrýmingarbúðum nasista en hún náði að taka með sér á flótta tösku móður sinnar sem geymdi óútgefin handrit.

Denise Epstein mun opna ljósmyndasýningu um ævi og ritverk móður sinnar nk. miðvikudag, þann 7. september kl. 17, í Borgarbókasafninu í Reykjavík. Sýningin ber yfirskriftina „Ég skrifa á brennheitu hrauni…“ en hún er skipulögð á vegum Alliance française í Reykjavík og er liður í hátíðarhöldum vegna aldarafmælis félagsins á árinu. Hún er sett upp í samstarfi við Borgarbókasafn Reykjavíkur og Reykjavík Bókmenntaborg UNESCO og stendur til 30. september, aðgangur er ókeypis og allir velkomnir.

Hér má sjá áhrifamikið myndband með viðtali við Denise Epstein þar sem fjallað er um örlög Irène Némirovsky og fjölskyldu hennar: http://vimeo.com/5807829

Denise Epstein mun lesa upp í Iðnó föstudagskvöldið 9. september og ræða við Friðrik Rafnsson í Norræna húsinu laugardaginn 10. september.

Bókaball með Geirfuglum

bokmenntahatid — Sat, 03 Sep 2011 08:54:03 +0000

Sú nýbreytni verður á Bókmenntahátíð í Reykjavík í ár að efnt verður til Bókaballs í Iðnó laugardagskvöldið 10. september. Húsið opnar kl. 22 og mun hljómsveitin Geirfuglar spila frá kl. 23.

Það er kjörið að skella sér í Bókmenntagöngu um Reykjavík fyrr um kvöldið sem leggur af stað frá Grófarhúsi kl. 20 og enda á Bókaballi í Iðnó með höfundum Bókmenntahátíðar.

Iðnó býður auk þess upp á þriggja rétta kvöldverðarseðil á sérstöku tilboðsverði og nálgast má upplýsingar um hann í Iðnó og í síma 562 9700.

Miðasala á Bókaballið fer fram á upplestrarkvöldunum í Iðnó og kostar miðinn 1500 krónur. Það gefst vart betra tækifæri til að bjóða uppáhaldshöfundinum í dans!

Sæluforskot

bokmenntahatid — Fri, 02 Sep 2011 08:27:38 +0000

Glæsilegur bæklingur Bókmenntahátíðar er tilbúinn og hægt að nálgast hann hér. Herlegheitin koma úr prentun næsta mánudag. Áhugasamir geta tekið forskot á sæluna með því að smella á bláu stafina.

Bæklingur_Innsidur

Sjósetning framundan

bokmenntahatid — Thu, 01 Sep 2011 11:31:35 +0000

Nú styttist óðum í að Bókmenntahátíð í Reykjavík ýti úr vör glæsilegri dagskrá. Eftir helgina er væntanleg úr prentun heildardagskrá hátíðarinnar og hér er skjal með dagskránni í heild sem er hægt að opna, prenta út og skoða vel og vandlega.

Bæklingur_Program

Gælur og skrælur

bokmenntahatid — Wed, 31 Aug 2011 22:44:03 +0000

Kristín Svava Tómasdóttir hefur sent frá sér tvær ljóðabækur. Fyrsta bók hennar Blótgælur kom út árið 2007 og vöktu þróttmikil ljóð bókarinnar verðskuldaða athygli. Nýjasta bókin Skrælingjasýningin kom út hjá Bjarti fyrr á þessu ári.

Hér les Kristín Svava ljóðið Mallorca úr Blótgælum í Kiljunni.

Árið 2008 gaf Tómas R. Einarsson út geisladiskinn Trúnó en þar semur hann lög við tvö af ljóðum dóttur sinnar. Hér má sjá flutning Ragnheiðar Gröndal á laginu Klof vega menn.

Kristín Svava mun lesa upp í Iðnó fimmtudagskvöldið 8. september.

Þar sem þýskan og íslenskan mætast

bokmenntahatid — Mon, 29 Aug 2011 23:44:58 +0000

Kristof Magnusson hefur þýtt fjölda íslenskra bóka yfir á þýsku. Meðal annars hefur hann þýtt Storm eftir Einar Kárason og 10 ráð til að hætta að drepa fólk og byrja að vaska upp eftir Hallgrím Helgason.

Nýjasta skáldsagan, Das was ich nicht, kom út í Þýskalandi árið 2010 og er væntanleg í íslenskri þýðingu hjá Forlaginu að ári. Vinnutitill bókarinnar er Það var ekki ég og Bjarni Jónsson þýðir.

Hér er þýsk heimasíða höfundarins: http://www.kristofmagnusson.de/ Þar má til dæmis sjá myndbönd þar sem höfundur les úr nýjustu bók sinni.

Kristof Magnusson mun lesa upp í Iðnó miðvikudagskvöldið 7. september og ræða við Ólaf Kristjánsson í Norræna húsinu sunnudaginn 11. september.

Ljósmynd af höfundi: Thomas Dashuber

Listin að vera kona

bokmenntahatid — Sun, 28 Aug 2011 14:14:08 +0000

Kristín Marja Baldursdóttir á sér stóran hóp dyggra lesenda hér á landi. Sá hópur stækkar óðum því bækur hennar hafa verið þýddar á að minnsta kosti 5 tungumál. Margar þeirra hafa komið út í Þýskalandi og í ár kom út nýjasta afurðin, Sternen eis, sem er þýðing á nýjustu bók Kristínar, Karlsvagninn.

Kristín Marja hefur að mestu fengist við skáldsagnarskrif en auk þeirra hefur hún gefið út ævisögu Vilborgar Dagbjartsdóttur og árið 2001 kom út smásagnasafnið Kvöldljósin eru kveikt.

Bókin Karítas án titils hlaut árið 2006 tilnefningu til Bókmenntaverðlauna Norðurlandaráðs. Bæði Karítas án titils og Óreiða á striga hlutu Fjöruverðlaunin, bókmenntaverðlaun kvenna, ásamt tilnefningu til Menningarverðlauna DV í bókmenntum.

Hópur danskra ferðamanna hefur komið til Íslands til að skoða söguslóðir Karítasar, í Öræfum og á Borgarfirði eystri.

Hér má sjá viðtal við Kristínu Marju af vef Sagenhaftes Island: http://www.sagenhaftes-island.is/hofundur-manadarins/nr/1323

Kristín Marja mun lesa upp í Norræna húsinu, laugardaginn 10. september kl. 15:30

Ljósmynd af höfundi: Einar Falur Ingólfsson